Suënz vëniel dit: ciancé poejies ie n lëur tl sulentum che vën fat tl cë y pra mëisa. Versatorium, na grupa de tradutëures, scienziates y scienziac y artisć y artistes de Viena nes desmostra l cuntrer. Tl 2013 se à chësta grupa metù adum per ciancé poejies, lauran ora deberieda la teoria de traduzion. Traduzions dl lëuratuere de Versatorium iel bele unides publichedes cun gran suzes y nes mostra su che ciancé poejies se dajan ju deberieda possa vester scialdi nteressant, produtif y zënzauter nce da plajëi.
Tl cheder dla manifestazions de giaurida dl ZeLT, Zënter europeich de leteratura y traduzion tla bibliotech de zità nueva a Persenon, uniral metù a jì dal 27 nchina al 29 d’utober dl 2021 l lëuratuere de traduzion Fjordarbeiten. Liejer y ciancé poejies te de plu rujenedes.
L possa fé pea dutes y duc che se nteressea per la traduzion leterera.
Ntan i trëi dis dl lëuratuere de traduzion uniral ciancià poejies dal liber Fjordarbeid dl autor norveges Arild Vange. L moto ie: chësc liber scrit te cater rujenedes (norvegëis bokmål, nglëisc, tudësch y franzëus) ne possa nia unì ciancià da una na persona sëula, ma mé da na grupa che sà de plu rujenedes y che rejona plu ala menuda de uni soluzion puscibla. L Südtirol y l Trentin ie n raion cun de plu variantes de rujenedes, o, per l dì autramënter, plën de fiords cun si rujenedes defrëntes te chëles che la poejies de Arild Vange possa unì ciancedes.
Per fé pea ne n’iel nia de bujën de savëi la cater rujenedes, ma dla despunibltà de se lascé ite sun la letura y la analisa dla poejies, coche nce dla ueia de fé pea pra na descuscion te de plu rujenedes sun poetica.
Fjordarbeiten
Liejer y ciancé poejies te de plu rujenedes
N lëuratuere de traduzion n culaburazion cun
Versatorium. Lia per poejies y traduzion, Viena y
ZeLT. Zënter europeich de leteratura y traduzion, Persenon, Südtirol
Dureda dl lëuratuere: Mierculdi, 27/10 – vënderdi, 29/10, uni di dala 9.00 nchin la 12.30 y dala 14.00 nchin la 18.00
Luech: Bibliotech de zità de Persenon, plaza dl Dom 13, 39042 Persenon
Per nfurmazions sëuraprò & prenutazion: office@zelt-lab.eu
Se scrì ite possen nchin ai: 15 d’utober dl 2021
L numer de partezipanc, zënza tenì cont di 8 cumëmbri dl Versatorium, ie limità a 8 persones. L unirà tëut dant chëles y chëi che fajerà pea ntan duc i trëi dis.
La partezipazion al lëuratuere ie debant.
Per maië y sté sëuranuet muessa i partezipanc se cruzië nstësc.