Giornata della Cultura Ladina 2026 | “Da una generazione all’altra”
Sat, Sep 19
|Cësa de Cultura a Urtijëi
Can & Ulà
Sep 19, 2026, 9:00 AM
Cësa de Cultura a Urtijëi, Strada Rezia, 1, 39046 Ortisei BZ, Italien
N cont dla manifestazion
“Di dla cultura ladina 2026”, na scomenciadiva dla Intendenza y Cultura Ladina dla Provinzia Autonoma de Bulsan en colaborazion con istituzions y lies ladines, che vuel festejé la cultura ladina te sia diversité con leteratura, ert, mujiga, performance y programs interatifs, en chest ann sot al titul “Da na generazion a l’autra”.
Danmesdì de cunfront n cont dla rujeneda ladina ncuei y duman
Dala 9 daduman uniral giaurì tla Cësa de Cultura n cunfront dedicà al prejënt y al daunì dla rujeneda ladina. Ntan l danmesdì dal titul "La rujeneda ladina ncuei y duman: de cie ons'a debujën? Cie possen pa fé? Ciunes ie pa la prioriteies?" vëniel metù n dialogh esperienzes y ponc de ududa defrënc, trajan ite istituzions, l mond dla scola y dla cultura, dla nfurmazion y dla nrescida linguistica. Tl zënter dla descuscion sarà l daunì dla rujeneda ladina, la ndesfidedes che la reverda y la azions che ie de bujën per ti garantì la vivanda y la trasmiscion ala generazions che vën do.
L fajerà pea Lara Moroder, presidënta dl Istitut Ladin Micurá de Rü, Heinrich Videsott, intendënt dla scoles ladines, Mathias Stuflesser, diretëur dla Repartizion Aministrazion Scola y Cultura ladina, Roland Verra, presidënt dla Union Generela di Ladins dla Dolomites, Mateo Taibon, jurnalist dla Rai, Gabriele Zanello, prufessëur assozià de Filologia y Linguistica dl romanc tl'Università de Udine, y Andreas Gabriel, secreter generel dla Lia Rumantscha.
Da dedò saral na mëisa turonda pra chëla che l fej pea l assessëur Daniel Alfreider, la diretëura dl Istitut Cultural Ladin Majon di Fascegn Sabrina Rasom, la diretëura de scola y vizepresidënta dl Istitut Ladin Micurá de Rü Monika Senoner y la prufessëura dl’Università Liedia de Bulsan Ruth Videsott.
L prugram dl danmesdì unirà stlut ju cun l ntervënt “Mic y realtà dl ladin standard“ dl'autëura ladina Rut Bernardi, che piterà n valgun mpulsc, nia zënza ironia, n con' de n argumënt che à descedà plu descuscions tl passà.
I muderadëures dl'ancunteda sarà Sofia Stuflesser y Carlo Suani.
Domesdì criatif y lëuratueresc criatifs tla Cësa de Cultura y te d'autra sëntes
L argumënt dl di, "Da na generazion al'autra", tulerà nce ite i plu jëuni, che vën nviei a n lëuratuere de fé bales. Chëstes unirà pona maiedes da marënda tla Cësa de Cultura, trasfurman l mumënt de cunvivënza te na ucajion sëuraprò per spartì y dé inant la tradizion.
Dala doi domesdì saral tla Cësa de Cultura y te d'autra sëntes ntëurvia n domesdì criatif cun truep cuntribuc interatifs, coordinà dala Union Generela di Ladins dla Dolomites. Te sales defrëntes, n pert nce tl medemo mumënt, pieta la lies y urganisazions cultureles ladines n program per pitli y granc: n curs de bal populer cun Lois Kastlunger y Eveline Vinatzer (UGLD), n cunzert dl cor de Runcadic, la mostra Berstot de Lenert (Istitut Ladin Micurá de Rü y Museum Gherdëina), la mostra dl'UNIKA (UNIKA), n teater impro-atif (Südtiroler Theaterverband), n lëuratuere de mujiga y cianties (Comunanza Ladina a Bulsan), la prejentazion dla tecnica artejanela Tar-Kashi (Union di Ladins de Ampëz), l juech da mëisa cooperatif Dolomythic (Union di Ladins de Gherdëina), n lëuratuere per fé ciofs de banda (Museum Ladin), la spiegazion dla tradizion dla Donaze (Le Donaze), la prejentazion dl guant dala gherdëina (Lia guanc dala Gherdëina) y dl guant ampezan (Union de i Ladins de Ampezo), n lëuratuere de reflescion n cont de sé nstësc - Anter me (Union di Ladins de Fascia), la prejentazion dla revista INCIPIT (Lia di autëures y dla autëures de Bulsan), i doi referac "Countdown to mass extinction" y "Conturines y Ursus ladinicus" (Museum Ladin), n film animà dla poejia "Sëida" de Rut Bernardi (SAAV), na mostra dl Portal Ladin (Union di Ladins de Gherdëina) y na prejentazion di resultac dl curs de ziplé (La Vëta).
Leprò saral nce truep lëuratueresc criatifs per mutons: l bosch (Comun General de Fascia), dessenië lijëndes ladines (Union di Ladins dal Col), depënjer tieres salveres (Lia di Iagri Ladins de Südtirol), teater per mutons (Museum Gherdëina).
Per l'ucajion resterà l Museum Gherdëina daviert dala 10 nchin la 6 da sëira.
Premiazions tla Cësa de Cultura
Dala 17:30 saral tla Cësa de Cultura n mumënt de mpurtanza particulera, dedicà ala memoria de Franz Vittur, a chël che l vën destinà l pest Merit Ladin 2026. L ntendënt da ntlëuta, che ie unì mancia da puech, unirà lecurdà y unerà ntan la zeremonia. Sëuraprò uniral nce nunzià l'opra d'ert che à venciù l cuncors d‘Ert X Merit Ladin y l unirà premià l'artista Christine Runggaldier che l'à realiseda. L unirà mo cunedì chi che à venciù Scribo y Scribo Junior 2026, i cuncorsc de leteratura ladina metui a jì dal Istitut Ladin Micurá de Rü n cunlaurazion cun l’Intendënza y Cultura ladina.
Ntan la zeremonia saral nce da udëi n valgun resultac di lëuratueresc criatifs metui a jì domesdì, testemunian l lëur y l'esperienzes arjontes ntan l di.
Da mesa la set va la festa inant sun Plaza S. Antone, ulache la lies Adöm y Cultura da Munt curerà l aspet gastronomich cun grilieda, cëives y buandes.
Dialogh danter leteratura, mujiga, ert y performance tl salon culturel
Dala 8 da sëira jirà l di inant tla sënta dla Lia Mostra d'Ert, cun l Salon Culturel, na sëira te chëla che l se anconta plu formes de esprescion artistica. N arà l plajëi de pudëi scuté su tel Tipes y Judith Piccolruaz, l‘autëures Teresa Palfrader Willeit y Nadia Rungger y nce na letura dl autëur o dla autëura che à venciù l cuncors Scribo. Mattia Maldonado, Silvia Baccanti, Marco Grigis y Giordan Crazzolara prejenterà na performance che cunlieia letura scenica, pitura dal vif, usc y mujiga. Sëuraprò puderan mo amiré n bal de Samuel Pellegrin deberieda cun Andrea Porro. La prejentazions d’uni sort sarà sëuraprò tl dialogh cun diesc artisć y artistes che à metù ora si opres tla sala, ntravaian rujenedes, formes y sensibltà artistica.
La manifestazion unirà registreda dala RAI Ladinia.
L finela mujighela: mujiga dal vif y cunvivënza
Per finé via l Di dla Cultura Ladina saral dala 21:15 inant mo “Mujiga anterores“, metù a jì dal'Uniun Adöm. Sun plaza S. Antone fajerà la grupes ladines Pëufla y COP Planta mujiga dal vif te n'atmosfera da se n sté saurì.
Nfurmazions de utl
Ntreda debant pra duta la manifestazions. Da maië y da bever a paiamënt tla segonda pert dl di.
Pra la manifestazion nvieda via dal’ Intendënza y Cultura ladina fejel pea de plu istituzions y lies cultureles ladines: l Istitut Ladin Micurá de Rü, l Museum Ladin Ciastel de Tor, la Union Generela di Ladins dla Dolomites, l Circolo Lia Mostra d'Ert, l'Uniun Adöm, l Istitut Cultural Ladin Majon de Fascegn, l Istitut Cultural Ladin Cesa de Jan, la Università de Udine, la Lia Rumantscha, la Università Liedia de Bulsan y de truepa d'autra istituzions y lies cultureles dla Ladinia.